La cësa dl luech da Gustin
Amesa i prei da La Poza tl scumenciamënt dl luech de Sëlva iel na cësa ulache l semea che l tëmp se ebe fermà. La cësa da Gustin ie una dla ultima testemunianzes de coche n vivova mo dan puec dejeneies tlo te Gherdëina. L lëur da paur ne dajova nia ca truep y l invern fova lonch, nsci ova la jënt metù man de ziplé per se davanië velch leprò. Tres i ferleigri y marcadënc che jiva pona ora per l mond a vënder chiena, ie l ert dl ziplé deventà un di lëures plu mpurtanc cun chël che la jënt de Gherdëina se trajova l viver. L unì su dl turism y l tëmp modern che univa docà a fat sfanté damprovia la cëses da paur che per cënc de ani ova fat l fat y caraterisova l cialé ora de nosta valeda.
Tla cësa da Gustin iel mesun se rënder cont mo drët avisa de coche n vivova plu da giut y chël nia mé n cont dl lëur da paur, ma nce de coche nosc antenac se dajova ju cun l’ert dl ziplé y dla massaria che i adurvova per chësc lëur.
Cësanueva y Valentin
(Pitura de Gustav Jahn)
Bele da for nes stajovel a cuer de fé n museum ora de chësta cësa. Per ti purté plu daujin y lascé udëi pusciblmënter a na gran cumpëida de jënta nosta arpejon culturela, se ons mpensà de mëter a jì per ntant n museum online. Nosc gran dejidere fossa chël de pudëi, n di o l auter, giaurì la cësa a duc i nteressei per pudëi jì a ti cialé da daujin.